EMYASI ERA YARENGAA ELUSUKU LUKULU LWE’KWANGIRIRA ECHILAANO CHIYAYAYA MWA CHITEMBO MWA BIRO 7/10/2017 KWA NGOMA
Mwa biro 7/10/2017 elubaa lwe’Batembo ala’uma na bera babo na banji bandu banene ba balalikwaa, babuanaa mwa musi we’Ngoma bushi ne’linye lye’kwangirira ne’kwemera changanama eChilaano Chiyaya cha babindwire mwe’teta lyetu lye’Chitembo.
Eli linye, lyàsimisaa ebandu busese. Bandu banene baíkaa: ebakosi ba Ongo, banya porotike, ebami be’Batembo na banji batembo banene batengeraa mwa bio byoshi by’eBatembo. Emulimo ola wàkolibwaa, abáa wa lumoo lunene. Na bushi no’ku eBatembo na bera babo ba báikaa kwo’lu lubuanano, batákebirire olu lusuku chiro na hicha.
Olu lubuanano lwàberaa mwa hoteri era bende beerika mbu New Riviera yo’kwa Ngoma. Mw’ei
hoteri mu ebandu boshi bahuukasibwaa: Bauma mwa baenyi babaa bamissionnaires ba bàtengeraa eAmerika, ne’banji, ne’banji eUganda, ne’banji eKenya, ne’banji eBunia ne’Isiro muno chio chetu. Abu twaamana mwa bamissionnaires bali bakosi bo’mwa SIL/ECG ba bende batuasa kwa mulimo we’kubindula ebibuliya mwe’teta lye’Chitembo. Abu bera betu, bàsanwaa busese mwa kulola kwa Batembo bali mwa buuma bamoera ne’Chinwa cha Ongo mwa kuchiterera. Abu bakosi be’SIL bera kuteta kwa banachiri bete mbuha ye’kuendekera kuasa eBatembo kukola kwa Chilaano cho’kwa mira.
Mwe’li linye, mwaikaa bakosi ba Ongo banene: Eveque we’Luhu lwe’ECC/Nord-Kivu, Eveque we’Luhu lwe’Anglicane kutenga eBukafu ala’uma ne’we’Balitheriens ola utula mwa musi we’Ngoma na Abe muuma we’luhu lwe’Katoliki kuno Ngoma. Abu boshi bànachiloreraa kwa Batembo batonga Ongo bushi ne’lumoo lwe’kubona eChinwa chai mwe’teta lyabo. Bushi ne’lumoo, chiro bakanatenga mwa lubuananao fuba.
Ebami be’Batembo nabo banáikaa mwa lubuanano kwa kulosa kwa oyu mulimo wakolibwe ne’babindusi àli wabo. Ekuika kwabo, kwasimisaa ebandu boshi na kulosa kanangana kwa eBami betu basimire eChinwa cha Ongo busese.
Era nyuma se’kuira ememo me’kuboola elinye, ekaperere kera kubanjibwa’mo, ebandu boshi bera kwêmanga. Ebakosi ba Ongo
be’Batembo, bera kwengirira bete karito kauma ke’bitabo bye’Chilaano Chiyayaya kwa chikoyi. Ebandu boshi bera kuhuta mwa ngaha na kubanda twabwabwe twa lumoo. Mwe’chi chihangi ebembi bera kutondoorera elwimbo lwa babaa bakunganyise mira kwa kwangirira eChitabo mbu: « Chechine, Chechine, Chechine Chaika! » Ebembi be’chikembe che’Shokororo, ne’Buuma, ne’GEBO ala’uma ne’Mutongo ne’luamba loshi lwe’bandu, bera kuchiterera. Ebatembo bera kwangirira eChitabo cha Ongo ngo’kwa mwami endee anêmikibwa mwa lubaa lwabo.
Era nyuma se’bi, Eveque we’Luhu lwe’Angilikani eBukafu tata BUSANE Sylvestre era kuboola ekarito, era kukula mu chitabo chiuma na abatula chi mwa chanya. Kanji ebandu bera kuhuba kuta mwa ngaha. Mwe’chi chihangi abaa asunguirwe na banji bakosi ba Ongo bera kuchitondeka era muhondo se’bandu. Mwabu bakosi ba Ongo mwabaa muli: Eveque muku-lukulu we’ECC Nord Kivu, Eveque we’kanisa ke’Anglikani Nord-Kivu, Eveque we’kanisa ke’Luterienne na Mukulu-kulu we’kanisa ke’ECC/5eCEBCE na Abe, mukulu-kulu muuma we’mwa kanisa ke’Katoliki kuno ngoma...
Mwe’li linye, mwana muuma wa bunyere wa myaka mwenda era kulosa emufa we’chi chitabo mu lwimbo lwa kabira. era kulikanusa kubuyabuya na kukulikanya ebitabo byoshi bye’Chilaano Chiyayaya kwa binatondekene, kutangirira ku Matayo kusinjira ku Byaboerwe. Emulimo oyu munyere airaa era kutuma elumoo lwaendekera lwaluwa busese mwa bandu ne’banji kusanwa ku babaa baendekera basanwa mbu alibwe! Mwana wande oyu mbe! Na banji bera kumusheba.
Emukulukulu Vice Kuferinere we’Nord-Kivu iwaikaa mwe’twe lye’banji bakulukulu be’chio. Oyu mukulu-kulu mango álolaa kwa myasi era yarengire, era kumowa busese. Era kunalosa n’ebatembo changana kwa kasi emulimo bairire ali wa mutoloke munene. Mwo’lu lumoo, era kuteta binwa bya kusesa ebandu emuchima. Mwa kulosa elumoo lwai no’mwa kulola kwa bya byàbere byaréchire etunda kwa mutembo ne’bandu boshi, era kubura esinji nyibaa mbu nasi sikulikiraa emyasi era Batembo baírire. Kanji bushi no’lu lumoo lwa lwábaa lwehwire mwa muchima, era kuteta mbu angachisesa kuisa eChilaano Chiyaya kwa masomo moshi ma mali mwa bio bye’Batembo mwa Nord-Kivu anabe ne’ma mali kwa lubibi lwe’Nord Kivu. Oyu mwasi, eBatembo boshi bera kumowera’o busese. Si kanji era kwana lwembo lwa ngaafu nguma kwa babindusi be’bibuliya mwa chitembo bushi ne’mulimo bakolire.
Lwarero, twete bitabo byumbi ekumi kwa bureau byetu bye’chitembo. Ebi bitabo biri aola kwa mufa we’batembo boshi. Bushi no’ku, chira mutembo aikaa kuula na kwana ewai muholore chasia tuhube kukula binji bitabo mwa buteya bwa bungabonekamungareta. Ebyera twahonda bibaa era muhondo se’kutangirisa kukunganya eChilaano cho’kwa Mira.
Ebandu ba bendee baasa ebatembo kwa mulimo we’kubindula ebibulya mwa chitembo beresibwaa nyembo kwa kulosa kwa kasi bakolaa mulimo munene. Mwa bandu ba babonaa esi nyembo muli: ebamissionnaires be’SIL, Kufernere yeine, ena eraliyo Sauti ya Injili, ne’batambo boshi ba batangirisaa emulimo we’kubindula ebibuliya mwa chitembo.
Rero bushi elinye kutula kulya na kumwa, kanji era muhondo ebatembo ne’batembo kasi bachiterere, ebatabana bera kutangirisa baambira ebandu ebiryo. Ba bàlyaa ebi biryo bàbaa bàli banene ku chumbi.
Kwa businda, tungateta kwa olu lubuanano lwabáa lwa ngahanyi sinene kanji lwamoeresaa ebandu ku njira ehatu: kwa njira ye’muchima, kwa njira ye’tunda ye’myanya ye’kabutwa ye’batembo, na kulosa ebuuma bwe’Mutembo. Ebyera binakulikene no’mwasi ola Kuferinere atetaa mbu « Kwemire chine chitabo chisindaire ekubika eBatembo mwa buuma. Kwemire eBatembo bamenyerere kwa kasi boshi batalikanusa kuuma. Kukomire eMutembo ola uli eKatuunda eBufamandu Bufamnadu, eMasisi emeraraa kwa munyakabo ola utula eSiralo alikanusa. Bushi eChitembo liri eteta lya lyete binwa binene bya bitechire kuuma si bitalikanusibwa kuuma. Bushi n’oku, ebatembo chira mundu endee emerera kwa mulikabo ateta bushi anabe ne’France nai eteta lyabo liri liuma si boshi batalikanusa kuuma. » Rero, utetandaa wakula endobo mwa kulikanusa kwa mulikenyu. Bushi no’ku tundaa twonvikana Batembo. Kanji eBatembo babaa mwa boolo ne’balungu ba batula balamire nabo mwa nzii.
Mango ebandu babaa baendekera balya na kumwa, ebatembo boshi, ebalume ne’bakasi ne’bana bera kuchuuma mwa chai basina emusheru ne’chumba ebatabana be’shokororo nabo bahondorere engoma. Ebami na binji bikondo bya balume ne’bamissionaire, boshi bera kunachitereraa.
Projet tembo
===========================
Elinye lye'kwangirira echitabo che'Chilaano Chiyayaya mwa Chitembo
Twahonda tubabure kwa mwa biro 07/09/2017 kungába linye linene lye’kwangirira eChilaano Chiyayaya mwa Chitembo. Eli linye lingába mwa musi we’Ngoma kutengera saa ene kuikira saa munane sa mushi.
Kwa lwa
kabiri biro 25/07/2017 mu mango emutukali munene ola wabáa weté ebitabo bye’Chilaano Chiyayaya abirikisaa’bi kwa Biro by’eChitembo.Twémeraa busese emyasi yoshi era ingárenga mwo’lu lubuanano.
Kanji Twémaa Ongo chasiya eChinwa cha Ongo cha chabindwirwe mwa Chitembo chiase Batembo banene kuata misi mwa michima yabo na banene babínduke kutenga mwa njira sabo sibi, baálukire Enawetu Ongo.
Bureau du Projet de Traduction de la Bible en langue tembo
Elubuanano lunene lwe'Buuma bwe'Batembo mwa musi we'Ngoma
Kwa Lwe’inga biro 30/04/2017 kwa Luhu lwa Ongo lwe’CEVAC, mwa musi we’Ngoma, elubaa lwe’Batembo ba batúla mwa musi we’Ngoma bayáa mwa lubuanano lwabo lunene lwa bénde báira chira mwaka. Ebalume, ne’bakasi, ne’batabana ala’uma ne’bangumwa, baíkaa banene mwo’lu lubuanano.
Emyasi yoshi yanárengaa kubuya bushi ebandu bàhambalaa mwa bôlo kanji mwa buuma. Era nyuma se’kumvirisa eraporo ye’komite ye’Buuma bwe’Batembo, kwa busibwaa binwa bieke, emuhambare era kulokerera. Era muhondo se’kuya ku inji myasi, emwimangisi we’Biro bye’kubindula eBibuliya mwa Chitembo, Rév. Masumbuko Shabani erésibwaa echinwa chasiya abálire ebandu kute emulimo áendekera. Mwa muhambare wai, oyu mwimangisi àburaa ebandu kwa elusuku lukulu lwe’kwangirira eChilaano Chiyaya cha chǎnjikirwe mwa Chitembo, lukaba lwandatu biro 26/08/2017. Era kubura ba bàbaa bàli mwa lubuanano kwa byemire eBatembo boshi babike emisi alauma chasiya olu lusuku, emyasi yoshi irenge kubuya.
Bureau du Projet tembo
Ekusoma eChilaano Chiyayaya mwa Chitembo
Mwa biro 04 byo’no mwesi wa kane, kwa Biro bye’Chitembo kwabáa lubuanano lwa kulosa ekumalirisa emulimo ola wakolibwaa kwa kutola emirenge ye’bandu ba bàsomaa echitabo che’Chilaano Chiyayaya mwa Chitembo. Kwo’lu lubuanano ebakulukulu ba bèmangirire ekomite ye’Biro bye’Chitembo baíkaa nga’kuno Rev. Balisha. Ne’bamangisi be’Buuma bwe’Batembo mwa Noro-KiFu nabo Balósaa etunda linene kwa kuika kwo’lu lubuanano. Abu Bakulukulu babáa bàli’mu : Maurice Bikoy, Maurice Kakoyi, Nono Runusi na Vicent Muhindo.
Mwo’lu lubuanano emwimangisi we’Biro bye’Chitembo, Rév. Masumbuko Shabani àtongaa Ongo kwa mulimo mubuya ola ba basómaa echitabo bàkolire. Oyu mulimo àalikanaa kurengera echikembe che’ Theovision International cha chitula mwa chio che’Ghana mwa musi we’ Accra, ne chikembe che’ Faith Comes by Hearing cho’mwa chio che’Amerika. Echikembe che’Theovison International chàtumaa barenga babiri kutengera eGhana, abu barenga ala’uma na Batembo banyaketu ba balóndolibwaa kwa kusoma, bàkolaa mulimo mubuya.
Eranyuma se’kwomvirisa chimbi chieke kwe’i myasi yàsomibwaa (Yowani 21), Ebandu boshi bera kusima busese. Mango bano bashamuka berésibwaa echinwa : Rév. Balisha, na Maurice Kakoyi na Maurice Bikoy, bera kuteta mbu bàinyire echinwa cha bàngalosa mwe’lumoo lwa lwèhwire mwa michima yabo, kwa kutonga oyu mulimo! Mama Nono nai mango òmvaa kwa myasi ìundukere mwa Chitembo, era kuteta mbu : « Nechi ! Elyera, kanangana lináli eteta lyetu lye’Chitembo !» Kwa businda, elubuanano lwera kwêresibwa etunda kurengera echihangi cha bǎngirisaa eseritifika kwa boshi ba bàsomaa.
Emwasi we’kukengesa, kuli kuteta kwa Ebi byàsomirwe, bitafure kuboneka mwa mino se’Batembo, bushi ebarenga bachiri bangábyěka eGhana, kwa kuendekera kubikola’ko kubuya-buya. Mwa kutenga eGhana, bangábituma eAmerika chasiya babísheerese kubuya busese.
Twáanyisa kwa chira Mutembo na chira mundu woshi ola wende wômva eri teta, angáahanyirwa na kubika ekalamo kai mwa mino sa Ongo mwa kûmvirisa kwa Chinwa cha Ongo chásomibwa mwe’ri teta lyetu libuya-buya.
Bureau du Projet tembo
Esite web ye'Chitembo
Twéte lumoo lunene lwa kubura ebandu boshi kwa esite web ye'chitembo yàboolibwe. Ei site ingátuasa kwa kulosa myasi inene era yèrekere elubaa lwe'Batembo.
Ene site yàboerwe kurengera emianyisa ye'bakosi ba bénde bábindula eBibuliya mwe'teta lyetu l
ye'Chitembo. Emulimo we'kukungánya ene site àkolibwaa mu lubuanano lunene lwa lwàbuanyanyaa bikembe ekumi na bibiri bya bandu ba bénde bábindula eBibuliya mwa mateta mabo. Olu lubuanano lwàbaa mwa musi we'Isiro kutengera mwa chiro chibere-bere kuikira mwa biro ekumi na bitano bya mwesi wa kane 2016. Rero mw'olu lubuanano mu twàkangirisibwaa kute kwa tungàboóla ene site.
Twáanyisa kwa mango ungálola kwa myasi era iri'mo, ungásima busese bushi ungámenyerera binene bya byèrekere elubaa lwe'Batembo. Mwe'ne site ungábuana mu bitabo bya kúsoma, eBibuliya bye'Chitembo, na nyimbo, na sinema ala'uma na bihuhanyi.
Projet tembo
